Robert Dan Giang Bejanji Deka Ngubah Pengidup Orang Pesisir Di Menua N25-Balai Ringin

Kuching
Thursday, 7 April 2011

Robert Dan anak Giang : Pilih meh iya nyadi pengari kita ke sekali tu!

Baka ke udah disadang, Robert Dan Giang udah dipilih bediri di sitak menua N25-Balai Ringin ngari ke parti SNAP. Awak ke bisi ditemu bala pengundi di N25-Balai Ringin, parti SNAP tu endang parti keterubah ditumbuh ke kitai Iban lalu masuk pengawa politik menua Sarawak. Lalu pia mega ari parti tu meh kitai Iban oleh nyadi Kepala Menteri Sarawak ti keterubah ianya Datuk Stephen Kalong Ningkan. Nya alai anang beciping ati kita ngundi pengari Parti SNAP. 

Lalu keterubah tu deka nerang ke pasal pengari kitai tu ianya Robert Dan Giang. Robert Dan tu siko kitai Iban ti megai pengawa bisnis kelebih agi ia ke besangkut enggau pengawa pun sabun. Maia bepilih tu, Robert Dan deka belaban enggau 5 pengari ari parti PKR, Bebas, PERSB, BN, PCM enggau BN.

Ari pasal pemandai pelajar sida ke bediri ditu, Robert Dan endang di muaenti dibanding ke enggau sida ke bukai, lalu iatu bisi ngembuan Master Degree.

Ari asal pendiau,  Robert Dan tu asal menua iya ti keterubahnya di Isu Pantu, lalu iya mega maia Primary School besekula di SRK Pantu, sebedau ke nyambung sekula iya di Sekolah Menengah Sultan Abdul Azis Shah (SAAS) Kajang, udahnya iya lalu nyambung pelajar iya di UPM.

Laban ke datai  ari menua Pantu ianya menua pesisir serta mega siti tempat ti pemadu nadai maju di Sarawak, dia Robert Dan dalam pengawa bepilih sekali tu, bejanji enti iya menang dia iya deka ngubah pengidup orang pesisir di menua N25 Balai Ringin  ngena jalai betanam betupi pun sabun. Laban menua N25 Balai Ringin endang kaya ari penatai tanah, pengawa nanam pun sabun endang dipelaba ke oleh ngubah pengidup orang pesisir di menua tu.

Lalu sebedau aku ngujung ke jako aku baka ke sekali tu, aku sekali agi minta bala ti diau di menua dalam genturung N25-balai Ringin meri sukong ngagai Robert Dan anak Giang, ianya pengari ari Parti SNAP. Aram kita sama-sama ngingat ke pasal menua kitai tu udah dipegai perintah BN nyau deka semak 50 tahun, tang lalu nadai bisi pemansang.

Pia mega enggai enda meri pengingat ngagai semua pasal pengari BN ti betanding sekali tu ianya Snowdan lawan. Snowdan Lawan enti semua kita agi ingat maia  pengawa ngundi tun 2006, iaitu nyadi  pengari laban ti dipilih Taib lalu ukai Jemut Masing. Pia mega aku deka nanya semua orang ke diau di menua N25-Balai Ringin , ngelama ke nyadi wakil rakyat di N25-balai Ringin, nama pemansang ke dibai Snowdan?

Lalu enggau aku nutup jako aku ke sekali tu, aku ngarap ke kitai bala di N25-Balai Ringin oleh ngundi ROBERT DAN ANAK GIANG nyadi pengari kitai ke sekali tu.

Mupok Aku

Remaung6Renjer

Agi Idup Agi Ngelaban