Best Blogger Tips

Friday 8 April 2011

N25-Balai Ringin Belaban Enam Sukut: Nama Kebuah Kini?

Kuching
Friday, 8th April 2011

N25-Balai Ringin tu sigi ari tiga sitak ti dipegai Sitak Parlimen P202-Sri Aman. Sitak tu mula ditumbuh ke dalam pengawa bepilih taun 2006. Nyadi orang ti keterubah nyadi pengari ba sitak N25-Balai Ringin tunya Snowdan Lawan udah iya ti ngalah ke Ibi Uding enggau Cobbold John Lusoi dalam pengawa bepilih taun 2006.
Nyadi maia bepilih ke sekali tu bisi enam iko sida deka belaban. Sida ti belabannya Snowdan Lawan (Barisan Nasional -PRS), Dan Giang (SNAP), Ibi Uding (PKR,  taun 2006 bediri ngari ke SNAP), Lipih Mawi (Parti Cinta Malaysia), Sujal Gansi (PERSB) enggau Cobbold Lusoi ari parti Bebas.

Nyadi nitih ke penerang ari opis SPR, N25-Balai Ringin tu bisi 8244 pengundi ti regista. lalu ari penyampau nya 86.7% pengundi Iban, Cina 8.5 %, Bidayuh 5.0 %, Melanau 0.2% enggau lain-lain bansa 0.01 %. 

Nama Kebuah maioh Amai Orang Belaban Ke Sekali Tu?

Ari penemu bala maioh ti bisi di dinga SNAP-N25BALAI RINGIN , dia sida bisi bekenang ianya ketegal  orang ti bediri di sitak N25-Balai Ringin ke sekali tu sampai enam iko, laban maioh pengundi di sitak tu nadai besetuju enggau Snowdan Lawan ti agi dipadu ke nyadi pengari dia. Ba penemu sida, sekumbang ke udah nyadi pengari di menua tu bepun ari pengawa bepilih taun 2006 suba sampai ke saritu, endang tak nadai bisi pemansang di bai iya ngagai menua tu.
Enti diperati ka, sebedau taun 2006, sitak N25-Balai Ringin  tu di antara tempat ti pemadu mundur di Sarawak. Saritu udah lebih kurang lima taun Snowdan Lawan nyadi pengari dia tang kandang menua tu endang agi meruan baka taun 2006 kelia endang NADAI PEMANSANG.
Ba penemu tauka ari peda sida iya Snowdan Lawan tu lebih mujur enti megai pengawa iya ke nyadi tuai Dayak Music Award DAMA, agipan  YB tu endang sigi rindu agi ke pengawa main musik,  ari ti nyadi ketuai rakyat ba sitak N25 Balai Ringin.

Enti Rakyat  Maioh Nadai setuju YB Tu Nyadi Pengari Sida tang nama kebuah maia ngantung nama kena 6 April 2011 tu tadi maioh amai penyokong (Ukai Pengundi  BN di Pantu ?

Maioh kebuah. Ari asil pansik kami, sekeda kebuah penyokong BN ti maioh ngenatai ke diri ngagai pengawa ngantung nama di Pantu kena 6 April 2011 tu tadi  nya bakatu :-

1. Keterubah laban deka meda pengerami. Agipan tu meh keterubah pasar Pantu tu nyadi tempat kena nganjung nama ke pengawa bepilih besai.

2. Deka boleh baju tauka topi free. Laban bisi bala ti ngenatai ke diri ngagai Pantu maianya madah ke diri bisi diberi BN baju enggau topi. Nya alai bala penyokong SNAP enggau PKR ti bisi ngenatai ke diri madah udah diberi orang baju enggau topi BN (Ambi anang enda kena tindok nyamai mai baju nya laban nipis !). Nya ti kebuah penyokong BN baka ke maioh!   

3. Ngarap ke Snowdan lawan bisi meri duit tau ke makai FREE. Nemu ajalah laban peruntukan BN ba pengawa bepilih raya tu endang besai. Dini sida bulih duit tau nanya Najib tauka Taib.

4. Laban diansak tuai rumah datai. Enti tuai rumah tu tadi dipeda enda oleh ngansak nembiak sida datai dia sida deka di anu Snowdan Lawan. Tauka enti sida empu nadai oleh datai..Abislah elaun RM 400 (jangka aku elaun tambah penyampau RM 400 deka dipadah maia kempen ke sekali tu).

5. Lalu kebuah ke penudi tauka kebuah ke besai sekalinya bala tuai rumah di N25-Balai Ringin di asoh Snowdan Lawan datai enggau nembiak sida lalu enti sida enda ngenatai ke diri dia sida iya deka diukum. Ingat tuai rumah maia ke diatu nya dipilih perintah BN. Barang sapa tuai rumah ti enda nyukong tuai rumah lalu deka dibuai..Lojik sejkali laban tuai rumah tu bis elaun diberi perintah..enti ngelaban dikena ke tindakan tatertib termasuk dibuai nyadi tuai rumah. Nya alai tuai rumah diatu ukai "to Serve their people" but "to Serve BN's leaders".;
    
Kati Bisi Peluang bala PR, SNAP  enggau bala parti Bebas Menang

Mesti bisi peluang menang magang. Enti nemu diri enda oleh menang kapa ka bediri. Ukainya baka ke nadai bebayar. Tang enda mega aku nyangkung pengawa sida ti deka bediri tu laban ti deka minta beli oleh pengari BN baka ke nyadi ngagai siko indu ti bediri di sitak tu ditu dalam tun 2006 tang "half-way" bekempen tak lalu badu laban ti udah dibeli orang. Ti deka nemu enggau silik tau nanya TR Bidi tauka ngusung blog Rajahmas.

Lalu enggau aku ngujung ke jako aku ke sekalitu, sekali agi aku ngingat lalu minta tolong ngagai bala maioh awak ke nyonteng pengari SNAP ianya Robert Dan Giang. Enti deka nemu enggau silik agi nama kebuah pengundi di sitak N25-Balai Ringin mesti ngundi pengari SNAP ianya Robert Dan ak Giang , kita tau klik ditui.

Mupok Aku

No comments:

Post a Comment